Tusschen Kortrijk en Lauwe

Blanche* en zijn peèrd

menschen, gah' gan kijken [mɛi]

want 't is 't kijken weèrd

e peèrd en e karre

ol wel honderd jaâr lank

doet dagelijks die zelfsten eigenste gank

 

o Blanche Blanche Blanche en zijn peèrd

djuk djuk judjuk mijn peèrd

 

je zegt, je zij' zot, wad is 't er an te zien

der zijn nu toch veel beter dijngen om te ryen

e karre, ochhêre, 't is 't klappen nie weèrd

en wa' vó speciaals is 't er nu an een peèrd

 

o Blanche Blanche Blanche en zijn peèrd

djuk djuk judjuk mijn peèrd

 

o, 'k voele g'heêl goed da j'me nie 'n verstaâd

't is nie de vitisse waâr da 't hem om gaâd

ok nie 't comfort van e sjyke slee ne?

maâr rijd eêrst e keê met die karre mee

 

o Blanche Blanche Blanche en zijn peèrd

djuk djuk judjuk mijn peèrd

 

en jij klapt dan meh Blanche en jij kijkt up da peèrd

en ol 't geên da j'zied, een groò' gat en ne steèrt

en hij verteld van zijn gròte voyage

en meh peèrd en karre en g'heêl zijn menage

 

O, Blanche Blanche Blanche en zijn peèrd

djuk djuk judjuk mijn peèrd

 

en 't peèrd stapt voòrt oòk vol diepe gedachten

wa' da j'van zò'n beêste nog nie' zou' verwachten

die smèrige auto's, da stijnkt ongezond

en jij kruld junder neuze voe nen peèrdestront

 

o, Blanche Blanche Blanche en zijn peèrd

djuk djuk judjuk mijn peèrd

 

dohbij, wijder peèrden zijn azò geboren

en je wit g'heêl goed, der gaâ nyks van verloren

de musschen up strâte gan der nie' van doòd

den ênen zijne stank is den anderen zijn broòd

 

o, Blanche Blanche Blanche en zijn peèrd

djuk djuk judjuk mijn peèrd

 

ja, zo is 't leven en azò is 't goed

en j' gaât 't nie' verbeteren, hoe hard da je ook wroet

vlieg nah de mâne en schiet 't ol kapot

'ke zeggen ekik mor dadde, wie is 't er hier de zot?

Blanche

 

o, Blanche Blanche Blanche en zijn peèrd

djuk djuk judjuk mijn peèrd

 

daa dokkerd die karre deur d'hobbelige strâte

van 's nuchtens tyelijk tət 's avonds lâte

dad is voh die tweê toch zoe simpel 't geluk

ze verstaan mekaâr meh ne sijmpele judjuk

 

oh, Blanche Blanche Blanche en zijn peèrd

djuk djuk judjuk mijn peèrd

 

menschen, ə j' passeerd tussen Kortrijk en Lauwe !!!

't komd up gin dag en 't stikt nie' zo nauwe

maâ j' moe' gan kijken, want 't is 't kijken weèrd

van 't schonste up de wèreld, 't is Blanche en zijn peèrd

van 't schonste up de wèreld, 't is Blanche en zijn peèrd

 

Blanche Blanche Blanche en zijn peèrd

djuk djuk judjuk, o

 

• /bl~ɑ:s(ə)/